“Кўнгилли спортчилар” гуруҳи ёрдами билан “Дўстлик” маҳалласи аҳолиси ўз уйларига қайтади

“Сардоба фожиаси” оқибатларини бартараф этиш мақсадида Сирдарё вилояти спорт таълим муассасаларида фаолият олиб бораётган тренер-инструкторлар, методистлар ҳамда спортчилардан тузилган “Кўнгилли спортчилар” гуруҳи табиий офатдан зарар кўрган аҳоли турар жойлари ва ижтимоий соҳа объектларида тозалаш ишларини давом эттирмоқда.

Куни кеча жами 130 нафар “Кўнгилли спортчилар” гуруҳи Сардоба туманидаги “Дўстлик”, Оқолтин туманидаги “Шодлик” ҳамда Мирзаобод туманидаги “Навбаҳор” маҳаллаларида аҳоли уй-жойларини тозалаш ва тиклаш ишларига кўмаклашди.

Табиий офатдан энг кўп жабр чеккан ҳудудлардан бири бўлмиш Сардоба туманидаги “Дўстлик” маҳалласини тиклаш ишлари қорақалпоғистонлик қурувчилар чекига тушган. Уларга ёрдамчи сифатида 48 нафар тренер ва спортчи ҳашарга келди. Маҳаллий аҳолининг айтишича, агар ишлар шу суръатда давом этадиган бўлса, узоғи билан 20 кун ичида уларнинг уйи тўлиқ таъмирдан чиқарилиб, фойдаланишга топширилади.

Оқолтин туманидаги “Шодлик” маҳалласидаги ишларга 62 нафар кўнгилли спортчи жалб этилди. Шунингдек, Мирзаобод туманидаги “Навбаҳор” маҳалласида ҳам 20 нафар спорт соҳаси ходимлари кўнгилли равишда тозалаш ишларида иштирок этди. Иш унумдорлигини таъминлаш мақсадида ҳашарчиларга шу ернинг ўзида тушлик ҳам ташкил этилган.

Шуни таъкидлаш керак, “Кўнгилли спортчилар” гуруҳи карантин қоидаларига қатъий амал қилган ҳолда юртдошларимизнинг оғирини енгил қилишда ўз ҳиссаларини қўшмоқда. Бу каби саъй-ҳаракатлар табиий офат оқибатлари тўлиқ бартараф этилгунга қадар давом этади.

Таъкидлаш керак, “Кўнгилли спортчилар” гуруҳининг эзгу ишлари “Ўзбекистон-24”, “Спорт-ТВ” ва “Sevimli” телеканаллари ҳамда Ўзбекистон миллий ахборот агентлиги ходимлари томонидан ОАВ орқали ёритиш мақсадида тасвирга олинди.