Кормье Нурмагомедовга: "Вақтни беҳуда сарфлашни бас қил"

PFL енгил вазн тоифаси чемпиони бўлган россиялик аралаш яккакураш устаси ўтган ойнинг охирида эркин агентга айланди. UFC 330 турнири арафасида у ташкилот вице-президенти Хантер Кэмпбелл билан суҳбатлашаётгани кўзга ташланди, бу эса енгил вазнли жангчининг дунёнинг энг кучли лигасига ўтиши мумкинлиги ҳақидаги хабарларни тасдиқлади.

Шунингдек, интернетда Кормьенинг Нурмагомедов билан мусобақа парда ортида суҳбатлашаётгани ва уни UFC билан шартнома имзолашга чақираётгани акс этган видео тарқалди.

"Эй, қачон келасан? Қачон бу ерга ўтасан? Вақтни беҳуда сарфлашни бас қил. Энди гап мерос ҳақида кетяпти. Мерос қолдириш вақти келди. Сен UFC енгил вазнли жангчиларини "қоп" (кучсиз) деб ҳисоблайсанми? Унда кел ва буни менга исботла! Уларнинг "қоп" эканлигини кўрсатиб қўй. Ҳозир мерос ҳақида ўйлаш вақти. Хабиб шундай деди, сен эса унга қулоқ солишинг керак", — деди икки вазнда собиқ UFC чемпиони, ҳозирда ташкилот шарҳловчиси сифатида ишлаётган Кормье.

Мағлубият нималигини билмай келаётган Усман Нурмагомедов Нью-Йоркдаги турнирда PFL енгил вазн чемпионлик камарини ҳимоя қилди. Оқшомнинг асосий жангида у америкалик Арчи Колганни биринчи раунддаёқ нокаутга учратди.