Кристиан Гарин совринни бегона қилмади

Chile Dove Men+Care Open мусобақасида дунёнинг 22-ракеткаси бўлиб турган Кристиан Гарин ғалабага эришди. Мезбонлар вакили бош соврин учун кечган финал учрашувида рейтингнинг 118-поғонасидан жой олган аргентиналик Факундо Баньисни мағлубиятга учратди - 6/4, 6/7(3), 7/5.

Икки соату 35 дақиқа давом этган баҳсда Кристиан 14 та эйс зарбани амалга оширди. Факундода эса бу кўрсаткич 8 тани ташкил этди. Теннисчиларнинг ўзаро учрашувларидаги ҳисоб мувозанати тикланди - 2:2. Бу Гариннинг жорий мавсумдаги биринчи, фаолиятидаги бешинчи соврини бўлди. Ўз ватанидаги муваффақиятли иштирок унга 45,000 доллар ҳамда 250 рейтинг очкосини тақдим этди.