17 мар 19:17
Янгиликлар

Кураш

Курашчиларимиз Осиё чемпионатида қандай таркиб билан иштирок этади? (Душанбедан фоторепортаж)

Хабар берганимиздек, 19-20 март кунлари Тожикистон пойтахти Душанбе шаҳрида миллий қадриятимизнинг бир бўлаги ҳисобланган кураш бўйича Осиё чемпионати бўлиб ўтади.

Айни пайтда мусобақага тайёргарлик жараёни якунланиб, Осиё чемпионатини қабул қилувчи арена шай ҳолатга келтириб қўйилди. Кеча ушбу аренада (суратдаги) теннис мусобақаси якунига етди ва бугун кураш қопламалари тўшалди, баннерлар илинди.

Қитъа чемпионатида йигирмага яқин давлатдан полвонлар иштирок этади, табиийки улар орасида кураш ватани вакиллари ҳам тўлиқ таркибда юртимиз шарафини ҳимоя қиладилар. Бугун Осиё чемпионатининг аксарият қатнашчилари Душанбе шаҳрига етиб келишди. Уларнинг катта қисми, хусусан Ўзбекистон терм жамоаси ҳам Тошкентдан поезд орқали Тожикистонга келди.

Афсуски, энг оғир вазн тоифасидаги курашчимиз Муҳсин Ҳисомиддиновнинг сўнгги паллада жароҳати сабаб Осиё чемпионатида қатнаша олмаслиги маълум бўлди. Мураббийлар штаби унинг ўрнини Шоҳруҳ Усмонов билан тўлдиришди.

Бугун куннинг иккинчи ярмида Душанбега етиб келган терма жамоамиз делегацияси шаҳар марказидаги "Авесто" меҳмонхонасига жойлаштирилди. Айнан шу меҳмонхонада Эрон, Хитой Тайпейи, Таиланд, Ҳиндистон каби давлат терма жамоалари ҳам қўним топишган.

Режа бўйича эртага куннинг иккинчи ярмида, аниқроғи соат 15:00да (Тошкент ва Душанбе вақт тафовути бир хил) Осиё Кураш Конфедерациясининг Конгресси ҳамда ОАВ вакиллари учун матбуот анжумани ўтказилади. Куннинг биринчи ярмида терма жамоамизнинг Душанбедаги илк машғулоти бўлиб ўтади.

Olamsport.com ижодий гуруҳи айни пайтда Душанбе шаҳрида бўлиб турибди ва қуйида эътиборингизга илк фоторепортажимизни тақдим этамиз. Мусобақа ўтказувчи арена, шаҳар кўчалари, делегацияларнинг ташрифига доир суратларни томоша қилиш орқали чемпионат шукуҳидан ғойибона баҳраманд бўлинг.

Терма жамоа таркиби:

60 кг: Абдулазиз Ҳамроев

66 кг: Артём Штурбабин

73 кг: Диёржон Баҳронов

81 кг: Умид Эсонов

90 кг: Жонибек Қозоқов

100 кг: Шерали Жўраев

100 кг: Авазхон Тўймуродов

+100 кг: Шоҳруҳ Усмонов

Қизлар

48 кг: Моҳинур Мўминова

52 кг: Ҳилола Ортиқбоева