Кутилмаган натижаларга бой Душанбе "Катта Дубулға" турнири якунига етди

Мукофот жамғармаси 154 000 еврони ташкил қилувчи ушбу мусобақада дунёнинг 5 қитъаси, 65 давлатидан жами 390 нафар (204 эркак, 186 аёл) дзюдочи медаллар ҳамда Париж-2024 Олимпиадаси йўлидаги қимматли рейтинг очколари учун татамига чиқди. 

Нуфузли турнирнинг сўнгги куни оғир вазн тоифасида беллашувлар ташкил этилди. Эркаклар -90, -100, +100 кг, аёллар эса -78 ва +78 кг вазн тоифаларида ўзаро беллашишди. Уч кунлик муросасиз баҳслар якунига кўра бироз кутилмаганда Швейцария терма жамоаси 2 та олтин ва 2 та кумуш медаль билан умумжамоа ҳисобида биринчи ўринни эгаллади. Афсонавий Тедди Ринер +100 кг вазн тоифаси финалида мезбонлар вакили Темур Раҳимовни иппон баҳоси билан енгиб, яна бир бор шоҳсупанинг энг юқори поғонасига кўтарилди. 

Австрия терма жамоаси 2 та олтин, 1 та кумуш медаль билан иккинчи ўринни банд этган бўлса, италиялик дзюдочилар 2 та олтин, 1 та бронза медали билан кучли учликка якун ясашди. Мезбонлар 1 та олтин, 3 та кумуш, 3 та бронза медали билан 4-ўринни эгаллашди. Топ-10`таликдан Германия, Франция, Мўғулистон, Япония, Канада ва Туркманистон терма жамоалари жой олишди.

Душанбе "Катта Дубулға" турнирида етакчи дзюдочиларсиз қатнашган Ўзбекистон терма жамоасига ягона бронза медалини Муҳаммад Жумаев (-73 кг) тақдим этди. Бу эса терма жамоамизнинг мусобақани 18-ўринда якунлашини таъминлади.    

Душанбе "Катта Дубулға" турнирининг сўнгги кун ғолиб ва совриндорлари:

-90 кг вазн тоифаси

1. Мансур Лорсанов (AIN)

2. Дэвид Кламмерт (Чехия)

3. Жу Йоп Ҳан (Корея Республикаси)

3. Муҳаммаджон Абдужалилзода (Тожикистон)

-100 кг вазн тоифаси

1. Женнаро Пирелли (Италия)

2. Даниэл Эйх (Швейцария)

3. Жафар Костоев (БАА)

3. Жаҳонгир Мажидов (Тожикистон)

+100 кг вазн тоифаси 

1. Тедди Ринер (Франция)

2. Темур Раҳимов (Тожикистон)

3. Денис Батчаев (AIN)

3. Лоссени Коне (Германия)

Аёллар 

-78 кг вазн тоифаси

1. Анна-Мария Вагнер (Германия)

2. Алина Боем (Германия)

3. Эмма Рейд (Буюк Британия)

3. Бита Пакут-Кложко (Польша)

+78 кг вазн тоифаси

1. Ася Тавано (Италия)

2. Кинга Волчжак (Польша)

3. Урсула Ҳофманн (Польша)

3. Ҳён Жи Ли (Корея Республикаси)