Ломаченко Ортисдан 270 граммга оғирроқ тош босди + ВИДЕО

Top Rank промоутерлик компанияси томонидан ташкил этилаётган ушбу бокс оқшомининг марказий жанги учта вазнда собиқ жаҳон чемпиони, pound-for-pound рейтинги аъзоси, украиналик Василий Ломаченко (16-2, 11 KO) ҳамда америкалик Жэмейн Ортис (16-0-1, 8 KO) ўртасида ўтказилади.

Анъанага кўра жангдан бир кун олдин барча иштирокчилари тарозидан ўтиш маросимида ҳозир бўлишди. Ломаченко рақибидан 270 граммга оғирроқ экани ойдинлашди. Василий тарозида 61,05 кг, Ортис эса 60,78 кг вазн қайд этган. 

Эслатиб ўтамиз, Василий Ломаченко ўзининг сўнгги жангини ўтган йилнинг декабрь ойида ганалик собиқ жаҳон чемпиони Ричард Комми (30-4-1, 27 KO)га қарши ўтказиб, рақибини очколар ҳисобига кўра мағлубиятга учратганди. Ортис эса шу йил май ойида Жамел Херринг (23-4, 11 KO)дан устун келган эди.