27 окт 19:47
Янгиликлар

Дзюдо

Лутфуллаев - “Катта Дубулға” турнири совриндори!

Бугун Бирлашган Араб Амирликлари пойтахти Абу-Даби шаҳрида дзюдо бўйича “Катта Дубулға” туркумига кирувчи нуфузли турнир старт олди.

Қувонарлиси, мусобақанинг илк куниёқ терма жамоамиз ғазнаси медал билан бойиди. -60 кг вазн тоифасида татамига чиққан Шарофиддин Лутфуллаев бронза медалига сазовор бўлди.

Лутфуллаев украиналик Артём Лисюк, грузиялик Лухуми Чхвимианини мағлубиятга учратди. Ярим финалда бўлажак чемпион грузиялик Амиран Папинашвилига ютқазиб қўйди. Бронза учун кечган баҳсда эса қозоғистонлик Елдос Сметовдан устун келди.

Ушбу вазн тоифасида ўз имкониятини синовдан ўтказган ёш дзюдочимиз Дилшодбек Баратов БАА вакили Аҳмад Ал Нақбини енгди. Лекин иккинчи босқичда айнан Елдос Сметовга имкониятни бой берди.

Эртага ҳамюртларимиздан -73 кг вазн тоифасида Ҳикматулло Тўраев ҳамда -100 кг вазнда Алишер Худойбердиев медаллар учун баҳсларга киришишади. Абу-Даби турнири Токио-2020 Олимпиадасига қимматли рейтинг очколарини тақдим этиши билан аҳамиятлидир.