Лёрнер Тьен Ёшлар ATP Якуний турнири ғолиби!

Мусобақа бош соврини америкалик Лёрнер Тьенга насиб этди. Қаторасига иккинчи йил ҳам финалга етиб келган дунёнинг 28-ракеткаси бу сафар ўз ниятига етди. Ўтган йили у финалда мағлубиятга учраган эди. 

Кечаги финалда Лёрнер ATP рейтингида 116-ўринни эгаллаб турган бельгиялик Александр Блоксни 4/2, 4/1, 4/3(3) ҳисобида мағлубиятга учратди. Теннисчиларнинг ўзаро учрашувларидаги ҳисоб мувозанати тикланди - 1:1. 

Бир соату бир дақиқа давом этган баҳсда Тьен 1, Блокс 7 та эйс зарбасини амалга оширган. Иккала теннисчи ҳам 1 тадан қўшхатога йўл қўйди. Брейклар бўйича устунлик чемпион томонида бўлди - 2 га 0. 

20 ёшли Тьен Ёшлар Якуний ATP турнирида чемпион бўлган иккинчи америкалик теннисчига айланди. Унгача Брэндон Накашима 2022 йилда ушбу турнирда чемпион бўлганди. Next Gen ATP Finals турниридаги муваффақият унга 502 250 АҚШ доллар келтирди.