Mағлубиятсиз UFC жангчиси Доғистонга бориб шуғулланиш нияти жиддий эканини айтди

UFC`да 93 кг гача бўлган вазн тоифасида иштирок этувчи Наваҳо Стирлинг Доғистонда шуғулланишга жиддий бел боғлаганини маълум қилди.

"Мен жон деб Доғистонга борган бўлардим... Кўряпсизми, Ислам Махачев таклифлар билан мурожаат қиляпти, лекин америкаликлардан ҳеч ким буни қабул қилмаяпти. Шундай таклифлардан бирини Махачев Деметриус Жонсонга юборганди. Уларнинг барчасининг фарзандлари бор [шунинг учун бу йигитлар рад этишмоқда]. Лекин, биродар, менда улар йўқ. Агар бу йигитлар менга қачондир [Доғистонга бориб шуғулланиш бўйича] таклиф билдиришса, албатта, икки-уч йилга эмасу, лекин бошланишига икки-уч ҳафтага боришим мумкин", — дея Стирлингнинг сўзларини келтирди журналист Ариэль Хельвани ўзининг Х ижтимоий тармоғидаги саҳифасида.

Наваҳо ММА`даги дебютини 2019 йилда ўтказган. Стирлинг ўзининг профессионал рекордида 11 та ғалабага эга (шулардан еттитаси нокаут билан) ва ҳозирча бирор марта ҳам мағлубиятга учрамаган.