Магнус Карлсен чемпион бўлган EWC 2026 турнирида Нодирбек нечанчи ўринни эгаллади ва қанча мукофот пулини қўлга киритди?

Мусобақада гроссмейстеримиз Нодирбек Абдусатторов ҳам иштирок этди. Ҳамюртимиз EWC 2026 баҳсларини кучли саккизталикда якунлади. Абдусатторов A гуруҳида кетма-кет 4 та учрашувда ғалаба қозониб, 100 фоизлик натижа билан тўғридан-тўғри плей-офф босқичига йўл олганди. 

Чорак финалда у беларуслик Денис Лазавикка қарши дона сурди. Барча 4 та асосий партия дуранг (2-2) натижа билан якун топди. Ҳал қилувчи Армагеддон партиясидаги ғалаба эса рақибга ярим финал йўлланмасини тақдим этди (умумий ҳисоб: 3-2). Армагеддонда қора донада ўйнагани учун Абдусатторовни дуранг ҳам қониқтирарди, аммо якундаги қўпол хато мағлубиятга айланиб кетди. 

Шу тариқа, гроссмейстеримиз нуфузли турнир Top-8`таликда якунлади ва 75 000 АҚШ доллари миқдоридаги мукофот пулига эга чиқди. Нодирбекни қийинчилик билан мағлуб этган Лазавик 1/2 финалда америкалик Ҳикару Накамурадан устун келди. Финалда эса норвегиялик афсона Магнус Карлсенга ютқазди. 

Магнус Карлсен бош соврин билан бирга 250 000 доллар мукофот пулини ҳам қўлга киритди. Иккинчи ўрин соҳиби Денис Лазовик 190 000, 3-ўрин учун кечган баҳсда франциялик Алиреза Фирузджани ютган Ҳикару Накамура 145 000 долларга бойиб олди. Алиреза банкдаги ҳисоб рақамини 100 000 долларга бойитди.