Магнус Карлсенни мағлуб этган шахматчиларимиз яна биттага кўпайди

Кеча оқшом ўтказилган турнирда бир неча нафар шахматчиларимиз ҳам иштирок этишди. Улар орасида 18 ёшли Исломбек Синдаров қора доналарда ўйнаганига қарамай, жаҳон тождори, норвегиялик шахмат афсонаси Магнус Карлсенни мағлуб этишга муваффақ бўлди. Исломбек Жавоҳир Синдаровнинг укаси ҳисобланади. Карлсен ака-укалардан қабул қилиб олган мағлубиятини эслаб юрадиган бўлди.   

Магнус турнир якунига кўра 11 имкониятдан 5,5 очко жамғариб, қўшимча коэфицентларга кўра 56-поғонадан жой олди. Исломбек Синдаров 6,5 очко билан 28-ўринни эгаллади. Ҳамюртларимиздан Жавоҳир Бозоров ва Саидакбар Сайдалиев 7 очкодан жамғариб, мос равишда 23 ва 25-поғоналардан жой олишди. 

Россиялик гроссмейстер Денис Лазавик 11 имкониятдан 9 очко жамғариб, мусобақа ғолиби ва шу билан бирга минг АҚШ доллари миқдоридаги пул мукофотига эга бўлди. Тўққизтадан очко тўплаган Эйтан Розен ва Марко Материа қўшимча коэфицентларга кўра кучли учликни якунлаб беришди.