"Мард ўғлон" - Шарофиддин Лутфуллаевни табриклаймиз!

Шарофиддин полвонлар юрти - Сурхондарё вилоятининг Ангор туманида дунёга келган. У аввалига кураш, кейин эса дзюдо билан шуғуллана бошлаган. Бугунги қаҳрамонимизнинг спортни танлашига меҳрибон онажониси сабаб бўлган. Мураббийи Сурхондарё вилоят дзюдо федерацияси раҳбари, шу билан бирга ҳозирда Ўзбекистон дзюдо федерацияси вице-президенти лавозимида ишлаб келаётган Бекзод Тўрабоев ҳисобланади. Шарофиддиннинг эришган ютуқлари ва бугунги даражасига чиқишида айнан Бекзод аканинг хиссаси ҳамда хизмати катта. 

Ўтган йилнинг сентябрь ойида Шарофиддин дзюдо ватани Японияда ўтган Жаҳон чемпионатида кумуш медални қўлга киритди. Лутфуллаев ўша мусобақадан сўнг Олимпиада рейтингида биринчи ўринга кўтарилиб олди. Шарофиддиннинг ютуқларидан яна бири 2013 йилда Абу-Даби Гран-присига тўғри келади. Ўшанда ёш дзюдочимиз Лондон-2012 Олимпиадаси чемпиони, Россия терма жамоасига 22 йиллик танаффусдан сўнг илк олтин медални тақдим этган Арсен Галстянни мағлуб эта олганди. Арсен Олимпиаданинг ярим финалида ҳамюртимиз Ришод Собиров, финалда эса япониялик Хироаки Хираокадан устун келганди.

Қувонарлиси, Мустақиллигимизнинг 29 йиллик байрами арафасида Шарофиддин Лутфуллаев "Мард ўғлон" давлат мукофотига лойиқ кўрилди. Албатта, бу унинг бир неча йиллик машаққатли меҳнати самараси, маҳсули. 

Фурсатдан фойдаланиб, Ўзбекистон дзюдо федерацияси раҳбарияти, мураббийлар ва спортчилар номидан терма жамоамиз етакчиси, жаҳон чемпионати совриндори, Тошкент давлат иқтисодиёт университетининг 3-босқич талабаси Шарофиддин Лутфуллаевни бугунги шукрона куни билан муборакбод этамиз. Унинг энг катта орзуси бу шубҳасиз, Олимпиада чемпиони бўлиш! Бу орзуни у айнан дзюдо ватанида ўтказиладиган Олимпиадада рўёбга чиқармоқчи. Бу борада унга омад ва зафар ёр бўлишини тилаймиз!