Марокаш Гран-Приси. Ўзбекистон умумжамоа ҳисобида ИККИНЧИ бўлди!

Марокаш Гран-Присининг сўнгги куни терма жамоамиз ғазнаси битта бронза медали ҳисобига бойиди. -100 кг вазн тоифасида юртимиз шарафини ҳимоя қилган Муҳаммадкарим Хуррамов мусобақанинг бронза медалини қўлга киритди. Хуррамов аввалига ўтиш баҳсида канадалик Шеди Алнахасни мағлубиятга учратди. Бронза медали учун кечган учрашувда эса эстониялик Григори Минаскиндан устун келди. Бу билан Муҳаммадкарим терма жамоамизга тўртинчи медални тақдим этди.  

Мусобақанинг иккинчи кунги баҳсларида -73 кг вазн тоифасида татамига чиққан Ҳикматилло Тўраев ҳам бронза медалига сазовор бўлганди. У бронза учун кечган учрашувда туркиялик Билал Чилоглуни мағлубиятга учратган эди. 

Марокаш Гран-Присининг илк кунги баҳсларида Шарофиддин Лутфуллаев (-60 кг) ва Сардор Нуруллаев (-66 кг) ўз вазн тоифаларида барча рақибларини мағлубиятга учратиб, олтин медал билан тақдирланишган эди. Уч кунлик мусобақа якунида дзюдочиларимиз 2та олтин, 2та бронза, 2та 5-ўрин билан умумжамоа ҳисобида иккинчи ўринни эгаллади. 

Марокаш Гран-присида ғолиб ва совриндор бўлган спортчиларимиз:

Олтин – Шарофиддин Лутфуллаев (-60 кг) ва Сардор Нуруллаев (-66 кг)

Бронза – Ҳикматилло Тўраев (-73 кг) ва Муҳаммадкарим Хуррамов (-100 кг)

Биздан мусобақанинг сўнгги куни Германия терма жамоасигина ўзиб кета олди. Олмонлар Марокашдан 2та олтин, битта кумуш, 4та бронза медали билан қайтадиган бўлишди. Улар ҳисобида яна 3та 5-чи ва битта 7-ўрин ҳам бор. Кучли учликка Франция терма жамоаси якун ясади. Фаранглар 2та олтин ва битта кумуш медалга сазовор бўлишди. 

Шунингдек, Испания, Туркия, Ирландия, Болгария, Россия, Словения, Сербия, Хитой Тайпейи, жами 11та мамлакат дзюдочилари битта олтин медални қўлга киритишди. Жами 31та жамоа вакиллари ҳисобида камида биттадан бронза медали бўлди.