Масвидаль Махачев - Гэрри жангига ўз тахминини айтди

Хорхенинг фикрича, Ислам UFC чемпионлик камарини муваффақиятли ҳимоя қилади ва Йен Мачадо Гэррини бўғиш усули билан таслим этади.

"Менимча, Ислам Гэррини ҳушидан кетгунча бўғади. Мен айнан шуни кутмоқдаман — Махачев чиқиб, унинг бўйнидан олади ва: "Бўлди, ширин тушлар", дейди. Агар бу бокс бўйича жанг бўлганида, мен юз фоиз Йен Гэррининг ғалабасига тиккан бўлардим. Ўйлайманки, у бешта жангдан учтасини, балки тўрттасини ютган бўларди. Боксда мен Махачевга деярли имконият бермаган бўлардим. Аммо бу грепплинг (кураш) бўйича жанг бўлса, мен бор пулимни Махачев ҳар сафар сабмишн (бўғиш ёки оғритиш усули) билан ғалаба қозонишига тиккан бўлардим", — деди америкалик жангчи Paramount нашрига берган интервьюсида.

Россиялик ва ирландиялик жангчилар ўртасидаги ярим ўрта вазн тоифасидаги чемпионлик жанги 16 август куни тонг саҳарда Филадельфияда бўлиб ўтадиган UFC 330 турнирининг марказий воқеаси бўлади. Бу жанг Ислам учун ушбу вазн тоифасидаги илк чемпионлик ҳимояси ҳисобланади.