Махачев Гэтжининг Топурия билан жангдаги ғалабасига муносабат билдирди

Америкалик 37 ёшли аралаш яккакураш устаси UFC White House - Freedom 250 турнирининг асосий жангида испаниялик Илия Топурияни техник нокаут эвазига мағлубиятга учратиб, енгил вазннинг янги чемпионига айланганди. Ислам қозонилган ғалаба билан табриклар экан, Жастин камарга бошқалардан кўра кўпроқ лойиқ бўлганини таъкидлади.

"Кимки ўзини катта олса, хор бўлади. Бу ўйинда даражалар бор. Табриклайман, Жастин, сен бу камарга ҳаммадан кўра кўпроқ лойиқсан!", - деб ёзди Махачев Х ижтимоий тармоғидаги саҳифасида.

Ислам бу гапи билан Илияни жангдан аввал катта гапиргани ва бир кун олдин дўстларини йиғиб, ҳали қўлга киритмаган ғалабасини нишонлаганига шаъма қилган.

Айни пайтда Махачев UFC’да 16 та ғалабадан иборат серияга эга. Исламнинг ҳисобида жами 28 та ғалаба ва битта мағлубият бор. У Нью-Йоркдаги UFC 322 турнирида бўлиб ўтган сўнгги жангида австралиялик Жек Делла Маддаленани ҳакамларнинг якдил қарори билан мағлуб этиб, ярим ўрта вазн чемпионига айланган эди.