Май ойи учун FIDE рейтинги эълон қилинди

Нодирбек Абдусатторов тўртинчи ўринда қайд этилган бўлса, "Номзодлар турнири" ғолиби, амалдаги Жаҳон кубоги соҳиби Жавоҳир Синдаров 5-ўринга кўтарилди. Норвегиялик Магнус Карлсен катта фарқ билан жаҳон рейтинги пешқадами бўлиб турибди. Кучли учликдан америкалик шахматчилар Ҳикару Накамура ва Фабиано Каруана жой олган. 

Узоқ муддатли танаффусдан сўнг 17-Жаҳон чемпиони Динг Ли Рен рейтингга қайтарилди. У 2025 йил давомида бирорта ҳам классик (FIDE рейтингига кирадиган) партия ўйнамади ва бир нечта кучли турнир таклифларини рад этди. Натижада, Гукеш Доммараджу билан кечган оғир баҳсдан бир йил ўтиб, 2025 йил декабрида FIDE уни "ноактив ўйинчи" сифатида расмий рейтингдан чиқариб ташлаган эди.

Энди эса, 2026 йил апрель ойида у Хитой жамоавий чемпионатида иштирок этиб, яна классик шахматга қайтди ва рейтингда қайта пайдо бўлди.