31 мар 14:07
Янгиликлар

Теннис

Майами. Ига Свёнтек "Мастерс" турнирининг ярим финалига чиқди

Майамидаги (АҚШ) "Hard Rock Stadium" аренада "Мастерс" турнирнинг яна бир чорак финал учрашуви якунланди.

Унда чехиялик 32 ёшли Петра Квитова ва польшалик 20 ёшли спортчи Ига Свёнтек ярим финал чиптаси учун баҳс олиб боришди.

Жаҳоннинг иккинчи ракеткаси Ига Свёнтек WТА рейтингида 32-ўринни эгаллаб турган Петра Квитовани 6/3, 6/3 ҳисобида мағлуб этди ва ярим финалга йўл олди.

Теннисчилар кортда 1 соату 17 дақиқа ҳаракат қилишди. Ушбу вақт давомида польшалик теннисчи иккита қўш хатога йўл қўйди, иккита эйс ва учта брейк қайд этди. Чехия вакиласи эса тўпни ўйинга киритишда бир маротаба хатога йўл қўйди, тўрт марта эйс зарбасини амалга оширди. Спортчилар бунгача ўзаро тўқнаш келишмаган.

Финал йўлланмаси учун Свёнтек америкалик Жессика Пегула билан баҳс олиб боради.