Мексика мустақиллигига бағишланган Noche UFC турнирининг асосий жанги эълон қилинди + ПОСТЕР

UFC раҳбари Дана Уайтнинг расмий равишда хабар беришича, ярименгил вазнда жанг ўтказиб келаётган бразилияликлар Диего Лопес ва Жин Сильва Noche UFC 3, яъни UFC Fight Night 259 турнирининг марказий жангида октагонга кўтарилишади. Турнир 13 сентябрь куни АҚШнинг Техас штати, Сан-Антонио шаҳридаги Frost Bank Center аренада ўтказилади. 

Одатдагидек, ушбу турнир 16 сентябрь куни - Мексика мустақиллиги кунига бағишлаб ташкил этилади ва табиийки, карддаги жангчиларнинг кўпчилигини айнан шу юрт аралаш яккакураш усталари ташкил этиб беради. Бу ҳисоб бўйича учинчи Мексика турнири бўлиб, бундан аввалгиларининг асосий жанглари мос равишда Алекса Грассо ва Валентина Шевченко (Noche UFC) ҳамда Шона О’Мэлли ва Мераб Двалишвили (Noche UFC 2) ўртасида маҳобатли "Сфера" аренада ўтказилганди.

Маълумот учун, Диего Лопес (26-7) шу йилнинг апрель ойида Илия Топурия вакант қолдирган чемпионлик камари учун кечган жангда Алекс Волкановскига ютқазиб қўйганди. Жин Сильва (16-2) эса UFC октагонида ҳали мағлубият нималигини билмай келяпти. Дана Уайт Даъвогарлар турнири орқали дунёнинг энг кучли лигасига қўшилган Сильва кетма-кет 5 та жангда зафар қучди. 

Айни пайтда Диего Лопес ярименгил вазн UFC рейтингида иккинчи, Сильва эса 11-ўринни эгаллаб турибди.