Мейвезерни қимматбаҳо соатларни ўғирлашда айблашмоқда. Жазо 20 йилгача қамоқ бўлиши мумкин!

Ҳодиса 2024 йил 31 декабрда боксчи Лас-Вегасдаги қимматбаҳо дўконлардан биридан соат сотиб олганида содир бўлган.

Суд ёзувларига кўра, дўкон жорий йилнинг апрель ойи охирида Мейвезер устидан даъво қўзғатган ва душанба куни боксчининг адвокати иштирок этган биринчи суд мажлиси бўлиб ўтган.

Даъвогарнинг таъкидлашича, Мейвезер ҳисоб рақамида пул етарли эмаслигини билган ҳолда чек ёзган, шунингдек, унинг эвазига сотувчи чек бўйича пулни олмаслигини билган ҳолда мол-мулк олган.

Мейвезернинг адвокати ESPN телеканалига унинг мижозида фирибгарлик нияти йўқлигини, у воқеадан олдин ва кейин дўкон эгаси билан шартнома тузганини ва дўкон эгаси фуқаролик судига мурожаат қилиши кераклигини айтди.

"Бу иш жиноят ишлари бўйича судда кўрилмаслиги керак. Жаноб Мейвезер суд жараёнида оқланишини кутмоқда", - деди адвокат.

Шунингдек, у Мейвезернинг яшаш жойини тарк этиши тақиқланмаганини ва навбатдаги мажлис 17 сентябрга белгиланганини маълум қилди. Флойд 27 июнь куни Афинада Майк Замбидисга қарши кўргазмали жанг ўтказади.

Мейвезерга иккита жиноий айблов қўйилган. 1200 доллардан ортиқ миқдордаги фирибгарлик учун у бир йилдан 4 йилгача қамоқ жазоси ва суд харажатларини қоплаш билан 5 минг долларгача жаримага тортилиши мумкин. 100 минг доллардан ортиқ ўғирлик учун эса бир йилдан 20 йилгача қамоқ ва 15 минг долларгача жарима. Америка қонунчилигида айбловнинг барча исботланган бандлари бўйича жазолар қўшилади.