Миллий олимпия қўмитаси Тошкент марказида илк маротаба отлар иштирокида ажойиб тадбир ташкил қилади

Миллий олимпия қўмитаси ташаббуси билан эртага, 7 июль куни Тошкент шаҳрида от спорти бўйича қизиқарли флешмоб ташкил қилинади. Аҳоли орасида от спортини оммалаштириш, ёшларнинг эътиборини унга қаратиш мақсадида ўтказилаётган тадбирга 100та от жалб қилиниши кутилмоқда.

Қайд этиш лозимки, бу каби чиқишлар жаҳоннинг турли мамлакатларида, деярли барча йирик шаҳарларда ўтказилади. Парад ажойиб от йўрттириш, уларнинг нозик йўрғалаши ва бошқа ажойиб чиқишларни томоша қилиш имконини беради.

Кўп асрлардан бери бу жониворларнинг садоқатлиги, чидамлилиги, тезлиги ва эркин ҳур ҳулқи инсонларни ҳайратга солиб келади. Олдин отлар жангчиларнинг содиқ дўсти бўлиб келган бўлса, ҳозирги кунда эса улар спорт майдонида чавандозларнинг ишончли шеригидир.

Ўзбекистон Миллий олимпия қўмитаси, Ўзбекистон йилқичилик ва от спорти федерацияси, Миллий Гвардия, Ички ишлар вазирлиги билан ҳамкорликда ташкил этилаётган ушбу тадбир эртага соат 18:00да пойтахтимиз марказида жойлашган "Амир Темур ҳиёбони"да бўлиб ўтади.

Қўшимча маълумотларни 148 31 13 рақамлари орқали олиш мумкин бўлади.

Ўзбекистонда илк маротаба ўтказилаётган ушбу ажойиб тадбирни ўтказиб юборманг!