Мирзоҳид Фармонов - Тунис Гран-Приси совриндори!

Пойтахт Тунис шаҳридаги El Menzah Sports Hall аренаси Гран-При туркумига кирувчи ушбу турнирга мезбонлик қилмоқда. Тунис Гран-Присида дунёнинг 50га яқин давлатидан 430 нафар дзюдочи жами 14та вазн (7 нафардан эркаклар ва аёллар) тоифасида татамига чиқишяпти.

Кечаги кунги баҳсларда Ўзбекистон спорт делегацияси ҳисобидаги медаллари сони биттага кўпайди. -73 кг вазн тоифасида татамига чиққан Мирзоҳид Фармонов бронза медалини қўлга киритди. У бронза учун кечган баҳсда франциялик Бенжамин Аксусни мағлубиятга учратди.

Маълумот учун, Мирзохид аввалига Босния ва Герцеговиния спортчиси Седрич Бессини мағлубиятга учратди. Кейин россиялик Сайар Ондардан устун келди. Швейцариялик Нилс Стампни мағлуб этган ҳамюртимиз ярим финалга йўл олди. Финал остонасида эса кутилмаганда косоволик Акил Гжаковага ютқазиб қўйди.

Эслатиб ўтамиз, мусобақанинг илк куни -66 кг вазн тоифасидаги вакилимиз Шаҳрам Аҳадов барча рақибларини мағлубиятга учратиб, Тунис Гран-Приси ғолибига айланди. Кеча татамига чиққан 20 ёшли Давлат Бобонов (-81 кг) эса илк даврадаёқ тунислик Абдулазиз Бен Аммарга имкониятни бой берди.