Мўминжон Абдуллаев: "Ушбу ғалабамни Мустақиллик байрамимизга бағишлайман"

Биз ушбу муваффақиятдан сўнг спортчининг фикрлари билан қизиқдик.

"Финалда жанг қилган қозоғистонлик рақибим жуда кучли спортчи эди. У икки карра Осиё ўйинлари ғолиби ҳисобланади, шунингдек, икки карра жаҳон чемпионатида ҳам совриндорлар қаторидан ўрин олишга муваффақ бўлган. Унга қарши жиддий тайёргарлик билан гиламга чиқдим. Мана, насиб қилган экан уни мағлубиятга учрата олдим. Ярим финалда эса эронлик полвондан устун келдим. У ҳам кучли спортчи эди.

Ушбу муваффақиятга эришганимдан жудаям хурсандман. Мени қўллаб-қувватлаган барчага, ватандошларимизга, ота-онам, оила аъзоларимга, барча-барчага раҳмат айтмоқчиман.

Мустақиллик байрами яқинлашиб келмоқда. Қўлга киритган олтин медалимни айнан ушбу байрамимизга бағишлайман. Барчага раҳмат", - деди Мўминжон Абдуллаев.

Эслатиб ўтамиз, Абдуллаев юнон-рум курашининг -130 кг вазн тоифасида мусобақада иштирок этди. У мусобақа давомида Жанубий Корея, Тожикистон ва Эрондан ташриф буюрган полвонларни мағлуб этиб, финалгача етиб борди. Ҳал қилувчи баҳсда эса қозоғистонлик Нурмакан Тиналиевдан 8:0 ҳисобида устун келди ва шоҳсупанинг энг юқори поғонасидан ўрин эгаллади.