27 ноя 15:03
Янгиликлар

Тадбирлар

МОҚ раҳбари ва спорт вазири ОАВ ходимлари билан учрашди + ФОТО (тафсилотлар)

Теглар : Дилмурод Набиев Рустам Шоабдураҳмонов

Бугун "Севимли" телеканали биносида Ўзбекистон Миллий олимпия қўмитаси президенти Рустам Шоабдураҳмонов ҳамда Жисмоний тарбия ва спорт вазири Дилмурод Набиев иштирокида йиғилиш ташкил этилди.

Тадбирда шунингдек Ўзбекистон спорт ташкилотлари фаҳрийлари кенгаши раиси Комилжон Худойберганов, таниқли спорт шарҳловчиси Мирзаҳаким Тўхтамирзаев ҳам спикерлар сифатида иштирок этишди.

Очиқ мулоқот тарзида ташкил этилган суҳбатда спорт йўналишида фаолият олиб борувчи ОАВ ходимлари ўзларини қизиқтирган саволлар билан мутасаддиларга мурожаат қилишди.

"Жисмоний тарбия ва спорт соҳасида айни пайтда катта ҳажмдаги ишлар амалга оширилмоқда. Бу ишларни халққа етказиб беришда оммавий ахборот воситалари ходимлари билан ҳамкорлик катта аҳамиятга эга. Шу сабабли, таклифингиз, қандай мурожаат бўлса кўриб чиқишга тайёрмиз", - деди Дилмурод Набиев.

МОҚ раҳбари Рустам Шоабдураҳмонов эса бу сафарги Олимпия циклида ўзгача ёндошув асосида тайёргарлик кўрилаётгани, шу билан бирга ёш спортчиларни тарбиялаш ҳам асосий масалалардан бири эканлигига тўхталиб ўтди.

"Токио Олимпиадаси учун 100 та лицензия қўлга киритишни мақсад қилганмиз. Муҳтарам юртбошимиз бошчилигида спортчиларимиз учун барча шароитлар яратилган. Молиявий рағбатлантиришга ҳам алоҳида эътибор қаратилган. Спортчилар учун тиббиёт, психология, илмий йўналишларда ҳам иш олиб борилмоқда.

Шу билан бирга 2022 (ўсмирлар), 2024 йили ўтказиладиган Олимпия ўйинлари учун ҳам тайёргарлик ёддан чиқиб қолгани йўқ. Шу мақсадда кадет ва ёшлар терма жамоаларимизга ҳам эътибор қаратилмоқда", - деди Рустам Шоабдураҳмонов.

Тадбир давомида шунингдек спорт федерацияларидан маълумот олиш, у ерда фаолият олиб бораётган матбуот хизматлари фаолияти ҳақида ҳам сўз борди. Таэквондо, бокс, дзюдо каби спорт федерациялари матбуот хизмати фаоллиги алоҳида эътироф этилди.

Шунингдек, юртимизда қишки спорт турларини ҳам ривожланириш лозимлиги, бу борада Самарқанд, Андижон ва Қорақапоғистонда ҳам муз саройлари бунёд этилиши таъкидланди. Бундан ташқари спортчиларимизни халқаро мусобақалардан кутиб олиш тизими, уларнинг натижаларини ёритиш масалаларига ҳам тўхталиб ўтилди.