Муҳаммад Маддалена билан жанг қиладиган Махачевга маслаҳат берди

Асли фаластинлик Белал Исламга Маддаленга қарши жангда таваккал қилмасликка, беллашувнинг бошидаёқ рақибини партерга тушириб, мағлуб этишга ҳаракат қилишга чақирди. 

"Менимча, Ислам шунчаки жангни партерга ўтказиши керак. Унинг партердаги ҳаракати анча яхши. Жек "стойка"дан кўра айнан партерда жуда кўп хатоларга йўл қўяди. Махачев эса бундан фойдаланиши мумкин. У дарҳол Маддаленани партерга тушириши керак. Агар Ислам тик ҳолатда жанг қиладиган бўлса, унинг бу вазндаги гавда тузилиши ҳамда зарба кучи панд бериб қолиши мумкин. Нима бўлганда ҳам, воқеалар ривожи қандай бўлишидан қатъи назар, мен бу жангни қизиқиш билан кузатаман. Боиси, чемпионлик камарини қайтариб олмоқчиман", - деди Белал The Schmo нашрига берган интервьюсида.

Маълумот учун, Ислам Махачев ноябрь ойида Нью-Йоркдаги "Мэдисон Сквер Гарден" аренасида бўлиб ўтадиган UFC 322 турнирида яримўрта вазн тоифасида чемпионлик камарини Жек Делла Маддаленадан тортиб олишга уриниб кўради. Маддалена бу чемпионлик камарини айнан Белални мағлуб этиш орқали қўлга киритганди.