Муҳиддин Мадаминов жаҳон чемпиони, яна икки шахматчимиз совриндор!

27-28 сентябрь кунлари блиц, яъни тезкор шахмат бўйича баҳслар ташкил этилди. Ўғил болалар ўртасидаги мусобақада ҳамюртимиз Муҳиддин Мадаминов 13 имкониятдан 12 очко жамғариб, жаҳон чемпионига айланди. Биринчи рақам остида таснифланган FIDE байроғи остида ўйнаган россиялик Денис Лазавик 11,5 очко билан кумуш медаль соҳибига айланди.

Жаҳон чемпионатининг бронза медали яна бир ҳамюртимиз Муҳаммадзоҳид Суяровга насиб этди. У 10 очко билан кучли учликка якун ясади. Ҳумоюн Бегмуратов эса 9 очко билан 4-ўриндан жой олди. Жаҳон чемпионати совриндори бўлган уччала шахматчи ҳам сўнгги 13-турда қора доналарда ўйнаганликларига қарамай, рақибларини мағлубиятга учратишди.

Эътиборлиси, Муҳаммадзоҳид Суяров рапид баҳсларида 9 имкониятдан 7,5 очко тўплаб, жаҳон чемпиони бўлганди. Муҳиддин Мадаминов 7 очко билан кумуш, шунча очкога эга Денис Лазовик қўшимча кўрсаткичларга кўра бронза медалига эга чиққанди. 

Жаҳон чемпионатининг қизлар ўртасидаги блиц баҳсларида Умида Омонова кумуш медаль билан тақдирланди. Ҳамюртимиз 13 имкониятдан 9,5 очко жамғарди. Нидерландиялик Элин Роберс 12 очко билан жаҳон чемпиони бўлди. Россиялик Александра Тарасенко 9 очко тўплаб, бронза медалига сазовор бўлди.

Терма жамоамиз аъзоларидан Мадинабону Халилова 6, Афруза Ҳамдамова 13-ўрин билан кифояланди.