Надаль иштирок этмайдиган АТР Якуний турнирига қуръа ташланди

Маълумки, Якуний турнирда дунё рейтингининг кучли саккизталигидан жой олган ракетка усталари бош соврин учун баҳсларга киришишади. Кеча Лондонда ушбу нуфузли мусобақага қуръа ташлаш маросими ўтказилди. 

Биринчи гуруҳдан Новак Жокович, Александр Зверев, Марин Чилич ва Жон Изнер жой олишди. Америкалик Изнер дунёнинг биринчи ракеткаси испаниялик Рафаэль Надалнинг ўрнини эгаллади. Надаль жароҳати сабаб турнирда қатнашмасликка қарор қилганди.

Иккинчи гуруҳда эса Рожер Федерер, Кевин Андерсон, Кэи Нишикори ва Доминик Тим ўзаро баҳс олиб боришади. Аргентиналик Хуан Мартин Дель Потронинг ўрнини эса япониялик Кэи Нишикори эгаллади. 

Мана шу саккиз теннисчидан бири турнирга қадар жароҳат олса ёки бошқа сабаб билан мусобақада қатнашишдан бош тортса, уларнинг ўрнини хорватиялик Борна Чорич ҳамда россиялик Карен Хачанов тўлдиришади. Айнан шу икки ракетка устаси захира теннисчилари сифатида эътироф этилди.