Надаль ва Медведев Акапулько турнири ярим финалида тўқнаш келади

Бугун турнирнинг ярим финалчилари номи маълум бўлди. 

Жаҳоннинг бешинчи ракеткаси испаниялик Рафаэль Надаль Акапулькодаги турнирнинг чорак финалида АТР рейтингида 39-ўринни эгаллаб турган америкалик Томми Полни 6/0, 7/6 ҳисобида мағлуб этди ва ярим финалга йўл олди. Учрашув 2 соату 3 дақиқа давом этди. Бу спортчиларнинг биринчи расмий учрашуви эди.

Надалнинг ярим финалдаги рақиби Медведев ва Нисиоко ўртасидаги учрашувда аниқланди. Жаҳоннинг иккинчи ракеткаси, россиялик Даниил Медведев турнирнинг чорак финалида АТР рейтингининг 103-поғонасидан жой олган япониялик Ёшихито Нисиокони 6/2, 6/3 ҳисобида мағлубиятга учратиб, ярим финалга чиқди. Учрашув 1 соату 10 дақиқа давом этди. Ўзаро учрашувларда ҳисоб россиялик теннисчи фойдасига 2:0 кўринишига келди.

Эртага Рафаэль Надаль ва Даниил Медведев турнирнинг ярим финал учрашуви доирасида ўзаро баҳс олиб боради. Бу мавсум бошидан буён уларнинг иккинчи учрашуви бўлади. Теннисчилар бундан аввал Australian Open 2022 финалида тўқнаш келган ва унда Надаль чемпионликни қўлга киритган эди.