Наманганда гандбол бўйича Ўзбекистон чемпионати ўтказилди + ФОТО

Деярли бир ҳафта мобайнида қизлар биринчилигида 11, ўғил болалар мусобақасида эса 10 та жамоа чемпионлик учун беллашди. 

Ўзбекистон Республикаси Ёшлар сиёсати ва спорт вазирлиги ҳамда Ўзбекистон гандбол федерациясининг 2023 йилги мусобақалар ўтказиш тақвим режасидан ўрин олган ушбу чемпионат сарҳисобига кўра, қизлар орасида андижонлик гандболчилар чемпионлик нашидасини суришди. Шоҳсупанинг иккинчи поғонасини Қорақалпоғистон Республикаси вакилалари эгаллашган бўлса,  фахрли учинчи ўринни Наманган вилояти жамоаси банд этди. 

Ўғил болалар ўртасида Сурхондарё вилояти жамоаси зафар қучди. Андижон вилояти жамоаси иккинчи, Наманган вилояти жамоаси учинчи ўрин соҳибига айланди.

Чемпионатнинг тақдирлаш маросимида қатнашган Ўзбекистон гандбол федерацияси бош котиби Исмоилжон Матхолиқов ва бошқа расмийлар ғолиб ва совриндор жамоалар спортчиларини эришган ютуқлари билан қутлаб, уларни қимматбаҳо совғалар, тегишли даражадаги медаль ва диплом билан тақдирлашди.

Икром ХУДОЙБЕРГАНОВ тайёрлади