"Насаф" ОЧЛ Элитда кимлар билан ўйнайди?

Элит ОЧЛда Ўзбекистон учун битта жой ажратилган бўлиб, унда фақат чемпион иштирок этади. Ўзбекистон Кубоги соҳиби "Андижон" эса Осиё чемпионлар Лигаси 2 мусобақасида қатнашади.

Бугунги кнга келиб Элит ОЧЛда ўйнайдиган барча жамоалар номи маълум бўлиб улгурди. ОФК клубларга квота ажратаётганда Саудия Арабистони билан БААга иккитадан жой берган. Қатар 2+1 кўринишдаги квотага эга бўлган. Яъни, +1 жамоа ўз омадини ўтиш ўйинида синаб кўради. Эронга 1+1 берилган бўлиб, Ўзбекистон ва Ироқ биттадан ўринга эга бўлган.

Ўтган йил бўлгани каби бу мавсум ҳам Элит ОЧЛда Ғарб минтақасида 12та, Шарқ минтақасида ҳам 12та клуб қатнашади. Саудиянинг "Ал Аҳли" клуби Элитнинг амалдаги ғолиби ҳамда БААнинг "Шаржа" клуби ОЧЛ 2нинг амалдаги чемпиони сифатида тўғридан тўғри Элитда қатнашади.

Иштирокчи жамоалар:
1. Саудия Арабистони - "Ал Аҳли" (Элит ОЧЛ ғолиби), "Ал Иттиҳод" (Саудия Про лигаси чемпиони), "Ал Ҳилол" (Саудия Про лигаси вице-чемпиони).
2. БАА - "Шабаб Ал Аҳли" (БАА Про лига чемпиони), "Шаржа" (ОЧЛ 2 ғолиби/БАА Про лига 2-ўрин соҳиби), "Ал Ваҳда" (БАА Про лига 3-ўрин соҳиби).
3. Қатар - "Ал Садд" (Қатар Юлдузлар лигаси чемпиони), "Ал Гарафа" (Қатар Амир Кубоги соҳиби).
4. Эрон - "Трактор" (Эрон Про лига чемпиони).
5. Ўзбекистон - "Насаф" (Суперлига чемпиони).
6. Ироқ - "Ал Шорта" (Ироқ Юлдузлар лигаси чемпиони).

Шунингек, 12-жамоа номи "Ал Дуҳайл" - "Сепахон" ўртасида бўлиб ўтадиган ўтиш ўйинидан сўнг маълум бўлади. Мазкур баҳс 12 август куни Доҳадаги "Абдуллоҳ бин Халифа" стадионида бўлиб ўтиши белгилаб қўйилган, аммо Эрон ва Қатар ўртасидаги сиёсий вазият туфайли учрашув бошқа жойга кўчирилиши мумкин.

Ўтиш ўйини битта учрашувдан иборат бўлади ва ютган жамоа ОЧЛ Элитнинг 12-иштирокчисига айланади. 15 август куни асосий мусобақага қуръа ташлаш маросими бўлиб ўтади. Қуръа форматига кўра, жамоалар гуруҳга ажратилмайди. Ҳар бир клуб ўз рақиблари билан уйда ва меҳмонда тўрттадан жами 8та ўйин ўтказади.

ОЧЛ Элит 1-тур учрашувлари 15-16 сентябрга белгиланган. Биринчи босқич якунига етгач, нимчорак финал баҳслари уй-меҳмон тарзида иккита учрашувдан иборат бўлади. Чорак финалдан бошлаб то финалга қадар барча ўйинлар худди ўтган мавсумдаги каби Саудия Арабистонида ташкил этилади.

Х.Холиқов.