Навоийда Ўзбекистон чемпионати бошланди, иштирокчилар орасида Миллий гвардия жамоаси ҳам бор

Навоий Олимпия захиралари коллежида бўлиб ўтаётган баҳсларда бир қатор янги жамоалар ҳам иштирок этишмоқда. Жумладан, Ўзбекистон Республикаси Миллий гвардияси, Мудофаа вазирлиги ҳамда Тошкент давлат транспорт университетининг “Транспортчилар” жамоалари мусобақада дебьют қилишяпти.

Бироқ, сўнгги йилларда мамлакатимизнинг етакчи жамоаларидан бирига айланган, хусусан ОТМК, “Ўзтелеком” каби номдор клубларимизга муносиб рақобат тақдим этаётган “Ориент” жамоасининг бу йилги чемпионатда иштирок этмаётгани кўнгилни хира қилади.

29-бор ўтказилаётган мамлакат чемпионатида қуйидаги жамоалар иштирок этмоқда:

“Жиззах давлат педагогика институти-Зиёкор” (Жиззах), Қўқон давлат педагогика институти (Қўқон), Қорақалпоғистон Республикаси (Нукус), Олмалиқ тоғ-металлургия комбинати (Олмалиқ), “Навоий давлат педагогика институти-Олимп” (Навоий), Мудофаа вазирлиги (Тошкент), Миллий гвардия (Тошкент), “Ўзтелеком” (Самарқанд), “Транспортчилар” (Тошкент), “Навоий тоғ-металлургия комбинати-Сўғдиёна” (Навоий), “Парвоз” (Наманган).

Кеча мусобақанинг тантанали очилиш маросими бўлиб ўтди. Унда Навоий вилоят Жисмоний тарбия ва спорт бошқармаси бошлиғи Шаҳло Нарзиева, Ўзбекистон волейбол федерацияси бош котиби Хусан Насруллаев ва бошқалар сўзга чиқиб, мусобақада барча жамоаларга омад тилашди.

Мусобақанинг илк кунида қайд этилган натижалар билан танишинг:

ҚДПИ (Қўқон) – “ЖДПИ-Зиёкор” (Жиззах) – 3:2

ОТМК (Олмалиқ) – Қорақалпоғистон Республикаси (Нукус) – 3:0

“НДПИ-Олимп” (Навоий) – Мудофаа вазирлиги (Тошкент) – 3:0

“Транспортчилар” (Тошкент) – “Ўзтелеком” (Самарқанд) – 0:3

“НТМК-Сўғдиёна” – “Миллий гвардия” (Тошкент) – 1:3

Мусобақа давом этмоқда.