Навоийда волейбол бўйича қизлар ўртасида халқаро турнир бўлиб зтмоқда

Режага кўра, Осиё волейбол конфедерациясининг йиллик мусобақалар тақвимига киритилган халқаро турнирда Марказий Осиё давлатлари, яъни Қозоғистон, Қирғизистон, Тожикистон, Туркманистон, Афғонистон ҳамда Ўзбекистоннинг 17 ёшгача бўлган қизлар терма жамоалари иштирок этиши белгиланган эди.

Афсуски, дунёда пандемик вазият яна жиддий тус олаётганлиги сабабли баъзи давлатларга ўз ҳукумати Навоийга келиш учун рухсат беришмади. Натижада халқаро турнирга фақатгина Қирғизистон ҳамда Тожикистондан жамоалар етиб келишди.

Халқаро турнирга етиб келолмаган давлатлар ўрнини тўлдириш мақсадида ташкилотчилар мусобақага Ўзбекистондан тўртта жамоа қўйишди. Булар – асосини Ўзбекистон қизлар терма жамоаси ташкил этган “Олимп”, Самарқанд, Қашқадарё ва Сурхондарё вилоятларининг маҳоратли қизларидан иборат “Сўғдиёна”, Хоразм вилояти ва Қорақалпоғистон Республикаси қизларидан ташкил топган “Ҳумо” ҳамда ўз таркибига Фарғона водийси вилоятларининг волейболчи қизларини жамлаган “Водий” жамоаларидир.

Мусобақанинг тантанали очилиш маросими ўтказилди. Унда сўзга чиққанлар волейбол дунёда энг оммалашган ва ривожланган спорт турларидан бири эканлиги, Ўзбекистонда ҳам ушбу спорт турини ривожлантириш масаласига ҳукумат даражасида эътибор қаратилаётгани, бунинг самараси ўлароқ мана шундай мусобақалар ташкил этилаётганлигини алоҳида эътироф этишди.

Очилиш маросимига маҳаллий санъаткорлар ва рақс ансамблларининг чиқишлари ўзгача файз бағишлади. Шундан сўнг мусобақага старт берилди.

Волейбол бўйича U-17 қизлар ўртасида халқаро турнир тафсилотлари билан танишишни истасангиз, сайтимизни кузатиб боринг.