Неймар хато туфайли алмаштирилди. У ЖЧ қайдномасига кириш учун курашаётганди

Ҳакам мураббийнинг алмаштириш ҳақидаги сўровини хато ўқиб, юлдузни ўйинни тарк этишга мажбур қилди.

Ҳодиса Бразилия А Сериясининг "Коритиба"га қарши ўйинида содир бўлди. Ҳисоб 0:3 бўлиб турганида, захира ҳаками Неймарнинг рақами ёзилган таблони кўтарди ва ҳужумчи ўзгартирилди.

Бир неча дақиқадан сўнг уни алмаштириш керак эмаслиги маълум бўлди.

ПСЖнинг собиқ супер юлдузи Бразилия терма жамоасининг ЖЧ учун қайдномасидан ўрин олишни истайди, шу боис ҳолатдан ғазаб отига минди ва алмаштириш ҳақидаги ёзувни эфир камерасига тутди. Бразилиялик футболчи қўлини силкитиб, аслида 31-рақамли футболчи Гонсало Эскобар ўзгартирилиши керак бўлганини кўрсатди. Бироқ Неймар ва "Сантос"нинг норозилиги ҳеч қандай фойда бермади. Ҳакам норозилик учун Неймарга сариқ карточка берди.

Шуни таъкидлаш керакки, алмаштириш вақтида Неймар аллақачон майдондан ташқарисида эди, тиббий ёрдам олаётган эди.

Ўйин "Коритиба"нинг 0:3 ҳисобидаги ғалабаси билан якунланди. Учрашувдан сўнг норози мухлислар ҳакамлар гуруҳига гамбургер ота бошлади ва айбдорлар полиция кўмагида ичкарига кириб кетди.