Нима учун теннисчилар ўйинларни сотадилар?

Мен профессионал теннисчиман. ATP рейтингида ҳам очколарим мавжуд. Асосан "Фьючерс", айрим вақтларда эса "Челленжер" мусобақаларида иштирок этиб келаман. Мен ўз исмимни ёки бирор бир теннисчининг номини аниқ айтиб ўта олмайман, чунки бу ишим орқали теннисдан бир умрга четлаштирилишим мумкин (келишилган ўйинларда қатнашган теннисчилар катта миқдорда жаримага тортилади ва теннисдан четлатилади). Тенниссиз эса мен ҳаётимни тасаввур эта олмайман ва бутун ҳаётимни теннисга бағишлаганман.

Бу воқеа бундан бир неча йил олдин бошланганди. Камина бир қанча турнирларда яхши иштирок этдим ва ATPдаги илк очколарга эга бўлдим. Ушбу мусобақаларнинг ҳаражатларини ота-онам кўтарарди. Мен бой оиладан эмасман ва турнирларда саёҳат учун қатнашиб юра олмайман. Ўз кучимга ишонаман ва доимо ғалабага интиламан.

Мен ғалабаларга эриша бошладим ва рейтингда аста юқорилаб бордим. "Фьючерс" турнирларининг бирида ёнимга бир одам келиб, илк даврада ютқазишим учун 1500 АҚШ доллари таклиф қилди. Рақиб анча кучсиз эди. Мен рози бўлмадим. Учрашувда ғалаба қозондим, бироқ ҳаёлимдан 1500 доллар кетмасди. Ўша турнирда иккинчи даврада ютқаздим ва ташкилотчилардан 200 доллар гонорар олдим. 1500 "кўкат" ишлашим мумкин эди деган ҳаёл тинч қўймасди негадир.



Орадан бир ҳафта вақт ўтди. Биринчи ракетка бўлиш истагидан ҳам кўра кўпроқ нотаниш инсоннинг таклифи ҳаёлимни банд этарди. Кейинги турнир вақти. Ўша шаҳс яна ёнимда пайдо бўлди. Бу сафар 2000 доллар таклиф билан чиқди ва мен рози бўлдим. Ўйин вақтида ич-ичимдан қалтирардим, совуқ терга ботардим. Илк даврада ютқаздим. Учрашувда икки ёки уч геймни ўз ҳисобимга ёзиб қўйдим ва ташкилотчилар томонидан бериладиган 117 долларга эга бўлдим. Бу пул солиқлардан сўнг яна камайди. Келишилган 2000 доллар эса ҳамёнимда. Энди бемалол кейинги мусобақаларда ўз ҳисобимдан иштирок этишим мумкин эди.

Ҳаётимда илк бор мусобақалардан қайтаётганда ота-онамга совға олдим. Уларга энди ҳаражатларимни ўзим қоплай олишимни, уларнинг ёрдами шарт эмаслигини айтдим. Улар хурсанд бўлишди. Энди мусобақалар вақтида меҳмонхона, еб-ичиш ва парвозлар учун тўловларни ўзим амалга ошира олардим. Энди жаҳон теннисига бемалол ёриб кираман деган ҳаёл ўтди.
Орадан бир неча ой ўтди. Ҳамён эса тобора бўшаб борарди. Ота-онамда мени қўллаб-қувватлашлари учун имкон йўқ эди. Меҳмонхона, рейслар, машғулотлар, мураббий... Ҳаммаси учун маблағ керак эди. Мусобақалардаги иштирок учун бериладиган пуллар эса бу чой-чақа эди холос.



Аргентинадаги "Фьючерс" мусобақаларнинг навбатдагиси. Қуръа менга омадсиз келди. Илк даврадаёқ турнирнинг биринчи сараланган теннисчисига қарши кортга чиқишим керак эди. Рақиб кучли мендан чамаси 600 ўрин юқорида эди. Учрашувга пухта тайёрландим. Биринчи сетни 6/1 ҳисобида ютдим, ҳайрон эдим. Иккинчи сетда 6/2 ҳисобида ғолиб бўлганимда эса барчасини тушундим. Мен бу бизнесда ягона эмасман. Кучсиз ўйинчиларга пул тикиб, букмекерлик компанияларида пул ишлаб олишяпти.

Ҳозирги пайтда ҳам "Фьючерс" ва "Челленжерлар" турнирларда учрашувларимни айримларини сотишга мажбурман. Асосан сетларни. Ҳозирги замонда кўпчилик геймларни, ҳаттоки ўзи йўл қўядиган қўшхатоларни ҳам сотмоқда.

Қилган ишимдан пушаймон эмасман, уялмайман ҳам. Лекин, мақтана ҳам олмайман. Ўйлайманки, ATP мусобақаларда совринлар жамғармаларни кўтармагунча мен ва менга ўхшаган теннисчилар спортнинг ушбу тури билан ҳар доим профессионал шуғулланиш учун ўйинларни сотишга мажбурлар.


Ҳусниддин Мирзалиев тайёрлади