Нотинч вазият сабаб кураш бўйича жаҳон чемпионати Эронда ўтказилмайди

Ушбу дунё биринчилиги 31 январь — 5 февраль кунлари Эрон Ислом Республикасининг Божнорд шаҳрида ўтказилиши белгиланган эди. Мазкур нуфузли мусобақага тайёргарлик ишлари юқори суръатда олиб борилаётгани ҳақида аввал хабар қилинганди.

Аммо 28 декабрь санасидан эътиборан Эрон Ислом Республикаси ҳудудида иқтисодий муаммолар билан боғлиқ аҳоли норозилик намойишлари кузатилмоқда. Вужудга келган вазият муносабати билан Халқаро Кураш ассоциацияси ушбу ҳолатни доимий равишда диққат марказида ушлаб, Эрон Ислом Республикаси Ёшлар ва спорт вазирлиги ҳамда Эрон Кураш федерацияси билан узвий ва мунтазам алоқада бўлиб келмоқда.

Шу муносабат билан, бугун IKA Президенти раислигида Кураш бўйича XV Жаҳон чемпионати масаласига бағишланган Халқаро Кураш ассоциацияси Бошқарув қўмитасининг шошилинч йиғилиши ўтказилиши белгиланди. Йиғилишда Бошқарув қўмитаси аъзолари, шунингдек, тегишли ҳамкор ташкилотлар вакилларининг иштироки кўзда тутилган. 

Йиғилиш якунлари бўйича қабул қилинадиган қарорлар жамоатчиликка тезкор тарзда тақдим этилади. Катта эҳтимол билан катталар ўртасидаги жаҳон чемпионати манзили ўзгариши мумкин. Мезбонлик учун асосий даъвогар Ўзбекистон! Катта эҳтимол билан жаҳон чемпионати Рамазон ойидан кейин ўтказилади. Аслида ушбу мусобақа ўтган йили Туркияда ўтказилиши керак эди. Лекин тайёргарлик даражаси етарли бўлмагани учун IKA Бошқарув қўмитаси октябрь ойида Туркиядан мезбонлик олиб қўйилган ва Эронга берилганди.