Нурмагомедов чемпионлик жангини қабул қилишга тайёр: у рақибларини айтди!

У енгил вазнда UFC камари учун курашиш ҳуқуқига эга бўлмаса, чемпионлик имкониятини хавф остига қўйиб, яна бир жанг ўтказишга тайёр.

"Агар бу Рамазон ойигача содир бўлмаса ва менга бошқа жанг беришса - Дэйвесон Фигередо, Эйман Заҳаби ёки бошқа биров билан жанг қилишдан хурсанд бўламан. Чунки бугун мен октагонда бироз яхшиландим, бу тажриба. Қафасда ўзингизни уйдагидек ҳис қилишингиз, ишонч, арена, мухлисларни ҳис этишингиз учун кўп вақт ўтказишингиз керак. Мен эса жанг қилмоқчиман. Шунчаки ухлаяпман, овқатланяпман, машқ қиляпман ва яна бу кетма-кетликни такрорлаяпман", - деди россиялик жангчи Абу-Дабидаги UFC 321 турниридан кейин ўтказилган матбуот анжуманида.

Умар Нурмагомедов кечаги жангда Баутистани ҳакамларнинг якдил қарори (30-27, 30-27, 30-27) билан мағлуб этди. Аммо ўзи иккинчи раундда рақибнинг тизза билан бошга берган зарбаси натижасида нокдаун ҳолатига тушиб қолди.

"Бунинг устида ишлайман. Менда битта катта хато бор: доим бошимни пастга эгаман. Жуда кўп шундай қиламан, ҳатто залда ҳам мураббий ва Хабиб менга доим шундай дейишади: "Бундай қилма. Сен буни тўғрилашинг керак. Бугун ҳам бунинг жазосини тортишимга сал қолди. Биз идеал эмасмиз, аммо шундай бўлишга ҳаракат қиламиз", - дея тушунтирди Нурмагомедов.