Нурсултон Рўзибоевнинг боксдаги жанги бекор қилинди

Унга кўра, шаҳрихонлик спортчимиз 30 июль куни Аkhmat Fighting промоушени томонидан Тошкент шаҳрида ташкил этиладиган ҳисоб бўйича 4-турнирда россиялик Сергей Гороков (13-6-2)га қарши рингга чиқиши керак эди. 

Аммо бу жанг ўтказилмайди. Бунга Нурсултоннинг UFC билан шартномасидаги бандлар сабаб бўлди. Рўзибоев келишувга кўра нафақат бошқа ММА ташкилотлар, балки бокс жангларида ҳам иштирок эта олмайди. 30 июль кунги бокс оқшомида Нурсултоннинг укаси Машраб Рўзибоев жанг ўтказади.  

"Биз Нурсултонга 2-3 та бокс жангидан кейин камар учун жанг ташкил этиб беришни режалаштиргандик. Бокс жанглари унга октагонда ҳам ёрдам берарди. Афсуски, Рўзибоевнинг UFC билан имзолаган шартномасида нафақат ММА, балки бокс жангларида ҳам иштирок этиши қатъий тақиқланган экан. У шу кунги бокс оқшомида фахрий меҳмон сифатида иштирок этади. Бокс мухлислари унинг укаси Машраб Рўзибоевнинг жангини кўришлари мумкин бўлади", - деди ташкилотчилардан бири бизга берган интервьюсида. 

Эслатиб ўтамиз, Нурсултон Рўзибоев аввал ҳам АFP турнирида икки бор бокс жангида рингга кўтарилган ва ҳар иккисида ғалаба қозонган эди.