Нью-Йоркда АҚШ ва Ўзбекистон каратэси ҳамкорлиги йўлида меморандум имзоланди

Келишув беш йилга мўлжалланган бўлиб, унинг доирасида икки мамлакат шинкиокушинкай каратэ вакиллари ўртасида мусобақа ҳамда семинарлар ўтказиш, ўзаро тажриба алмашиш каби йўналишлар бўйича ҳамкорликни ўз ичига олади. 

Ҳамкорликнинг илк қадами сифатида NUR-HAS каратэ маркази катта мураббийи, 5-ДАН қора белбоғ соҳиби, бранч-чиф (Жаҳон каратэ ташкилоти томонидан тайинланган вакил) Мутал Назаров 8-21 май кунлари АҚШда бўлди. 

Сафар давомида Лас-Вегас, Нью-Йорк ва бошқа бир қатор шаҳарларида халкаро семинарлар ўтказилди. Унда АҚШ спортчиларидан ташқари кореялик каратэчилар ҳам иштирок этишди. Энди режа бўйича Мутал Назаров июнь ойида Япониянинг Токио шаҳрида фуллконтакт каратэ бўйича ўтказиладиган биринчи жаҳон чемпионатида юртимиз шарафини ҳимоя қилади.

Шундан сўнг, каратэчиларимиз 21 июнь куни Тожикистон, 29 июнда Қозоғистондаги халқаро мусобақаларда иштирок этишади. Июль ойида Токио шаҳрида ёшлар ўртасида жаҳон чемпионати ўтказилади. Бу дунё биринчилигида ҳам ёш каратэчиларимиз медаллар учун баҳс олиб боришади. 

Бундан ташқари, барча вилоятларда халкаро семинарлар ва мусобақаларни тақвим режасида белгилан муддатда ўтказиш режалаштирилган.