ОЧЛ 2`да ҳаммаси тугади: Марказий Осиёдан ҳеч ким қолмади

10-12 февраль дастлабки учрашувлар ўтказилган бўлса, жавоб ўйинлари 17-19 февраль оралиғида бўлиб ўтди.

Нимчорак финал якунларига кўра, ҒАРБ минтақасидан БААнинг "Ал Васл", Иорданиянинг "Ал Ҳуссейн", Саудия Арабистонининг "Ал Насср" ҳамда Қатарнинг "Ал Аҳли" клублари 1/4 финалга йўл олишди.

Шунингдек, ШАРҚ минтақасида ҳам чорак финалчилар аниқланди. Таиланднинг "Ратчабури" ва "Бангкок Юнайтед", Сингапурнинг "Тампинес Роверс" ҳамда Япониянинг "Гамба Осака" клублари ўз рақибларини ортда қолдириб кейинги босқич масаласини ижобий ҳал этишди.

Ушбу мавсум бу мусобақада Марказий Осиёдан тўртта жамоа қатнашди. Ўзбекистон Кубоги ғолиби сифатида илк бор қатнашган "Андижон" гуруҳдан чиқа олмади. Жамоамиз беш дуранг ва бир мағлубият билан 5 очко тўплаган ҳолда афсуски, гуруҳ босқичини охирги ўринда якунлади.

Бизга яхши таниш бўлган Душанбенинг "Истиқлол" клуби Тожикистон чемпиони сифатида турнирда қатнашиб, бу жамоа ҳам ўз иштирокини гуруҳ босқичида якунлади. Ён қўшниларимиз олтита ўйиннинг учтасида ғалаба қозониб, 9 очко тўплаган бўлишларига қарамай фақат тўплар нисбатига кўра, Ироқнинг "Ал Завра" клубидан ортда қолишди.

ОЧЛ 2да Туркманистондан иккита клуб иштирок этди. "Аҳал" ҳам худди "Андижон" ва "Истиқлол" сингари ўз иштирокини гуруҳ босқичида якунлаган бўлса, секин-аста юқорига одимлаб бораётган "Аркадағ" гуруҳдан чиқишни уддалай олди ва нимчорак финалда Саудиянинг "Ал Насср" клубига имкониятни бой берди. Ҳар иккала ўйин 1:0 ҳисобида риёдликлар фойдасига ҳал бўлганини эслаб ўтиш жоиз.

Шундай қилиб, Осиё чемпионлар Лигаси 2 мусобақасининг чорак финалида Марказий Осиёдан ҳеч ким қолмади. Одатдагидек буёғига яна араблар курашни давом эттиради. 1/4 финал жуфтликлари қуйидагича кўриниш олган:

"Ал Васл" - "Ал Насср"

"Ал Аҳли" - "Ал Ҳуссейн"

"Гамба Осака" - "Ратчабури"

"Бангкок Юнайтед" - "Тампинес Роверс"

Дастлабки учрашувлар 3-5 март, жавоб баҳслари 10-12 март кунлари бўлиб ўтади.

Мусобақа низомига кўра, чорак финал ва ярим финал ўйинлари иккита учрашувдан иборат бўлади. Ярим финал дастлабки учрашувлар 7-8 апрель, жавоб ўйинлари 14-15 апрелга белгиланган. Мусобақанинг ҳал қилувчи финал баҳси 17 май куни ўтказилади.

ОЧЛ 2 регламентига кўра, Ғарбдан қайси жамоа финалга чиқса, финал шу жамоа майдонида бўлиб ўтади. Бу дегани ҳал қилувчи баҳсга БАА, Саудия Арабистони, Қатар ёки Иордания мезбонлик қилади. Яна бир маълумот, финал битта ўйиндан иборат бўлади ва бир пайтлар бўлгани каби жавоб баҳси ўтказилмайди.

Хайрулла Холиқов тайёрлади