Оғир атлетика. Осиё чемпионатини олтин медаль билан бошладик

Дастлаб мусобақанинг тантанали очилиш маросими бўлиб ўтди. Шундан сўнг, қизлар ўртасида -44 вазн тоифасида финал баҳслари бошлаб юборилди. Қувонарлиси, қитъа чемпионати терма жамоамиз учун омадли бошланди.

Ушбу вазн тоифасида юртимиз шарафини ҳимоя қилган спортчимиз Нигора Абдуллаева (2004 йилда туғилган) даст кўтаришда 67 кг, силтаб кўтаришда 81 кг. тошни ўзига бўйсундира олди. Умумий ҳисобда 148 кг. тош кўтарган ҳамюртимиз ўз вазн тоифасида энг яхши натижани қайд этди ва мутлоқ чемпионликни қўлга киритди. У ҳам даст кўтариш, ҳам силтаб кўтаришда ўз тенгдошлари орасида тенгсиз деб топилгани эътиборга молик.

Шу тариқа Нигора терма жамоамиз ҳисобига ушбу Осиё чемпионатидаги илк олтин медални қўшиб қўйди. Биз ушбу муваффақият билан спортчимизни, унинг мураббийи Тоир Пармоновни, шунингдек, Ўзбекистон оғир атлетика федерациясини табриклаб қоламиз.

Маълумот учун, Урганчдаги Осиё чемпионатида шу йил октябрда Аргентинада бўлиб ўтадиган III ўсмирлар Олимпия ўйинлари лицензиялари ҳам ўйналади.