Олимпиада иштирокчиси Комил Тўхтаев қишки универсиадада стартга чиқди

8 март куни тоғ чанғичиларимиз “Бобровый лог” Фанпаркида ўтказилган слалом-гигант бўйича баҳсларда иштирок этишди, деб хабар қилмоқда Жисмоний тарбия ва спорт вазирлиги матбуот хизмати.  37 давлатдан 102 нафар спортчи қатнашган беллашувлар қизғин баҳслар бой бўлди. Кескин бурилишларга бой тепаликдан тезлик билантушиш спортчиларга осон бўлмади. Биринчи уринишдаёқ хатога йўл қўйган ва финиш чизиғигача етиб кела олмаган 18 нафар спортчи баҳслардан четлаштирилди. Мисол учун кескин бурилишда йўл қўйган хатолари учун супергигант баҳслари ғолиби швейцариялик Лукаш Ципперт баҳслардан четлатилган бўлса, унинг жамоадоши суперкомбинация ғолиби Янник Шабло 29-натижани қайд этди. 

Пёнгчангдаги қишки Олимпия ўйинларида байроқдоримиз бўлган Комил Тўхтаев биринчи чиқишда 59.48 натижа қайд этди. Иккинчи чиқишда эса 1:03.43 дақиқада маррага етиб борди. Умумий ҳисобда 2:02.91 натижа кўрсатган Комил 102 нафар спортчи ичида 31-поғонани қайд этди. У пешқадам спортчидан 7.40 сония кеч финишга кириб келди.

Яна бир спорчимиз Низомий номидаги Тошкент давлат педагогика университети талабаси Алдиёр Гаипов умумий ҳисобда 2:20.90 натижа билан 51-ўринни эгаллаган бўлса, ушбу муассасанинг яна бир талабаси Дамир Бухарбаев иккинчи уринишда йўл қўйилган хато сабабли баҳслардан четлаштирилди.

Таъкидлаш жоиз, ушбу йўналишда олтин медални мезбонлар вакили Иван Кузнецов қўлга киритган бўлса, кумуш медал италиялик Алберто Бленджига ва учинчи ўрин швейцариялик Ливио Симонега насиб этди.