Олимпиада олдидан илк расмий машғулотини ўтказган Ейбог старт олдидан фикрлари билан ўртоқлашди (ФОТОГАЛЕРЕЯ)

У 14 февраль куни 500 м масофага кечадиган пойга саралашида стартга чиқади. Спортчимиз старт олдидан расмий машғулот ўтказди ва Ўзбекистон МОҚ ахборот хизматига кичик интервью берди.

"Биз тайёргарлик учун белгиланган кичик муз саройида белгиланган машғулотларимизни якунладик. Асосий комплексда фигурали учувчилар бўлгани учун ҳозир кичик аренадамиз. Музга мослашиб оляпмиз. Муз ҳар куни ўзгаряпти. Муз баъзан қаттиқ, баъзан юмшоқ. Конькиларни унга қараб, созлаб оляпмиз. Барча керакли созламаларни тўғри амалга ошириб оляпмиз. Мусобақада максимал натижани кўрсатиш учун барчасини қиляпмиз. Стартда яхши натижа қайд этиш учун ҳозир асосий ишни бажаряпмиз. Бугун Венгрия ва Белгиядан келган йигитлар билан шуғулландим. Улар менга ажойиб спарринг шерик бўлишди. Умуман олганда, барча спортчилар ҳозирда мусобақа учун юқори тайёргарлик олиб боряпти", дейди Ейбог.