Олимпиада совриндорлари Париж-2024 йўлланмаси учун Самарқандда кураш олиб боради. Триатлон бўйича Жаҳон кубоги олдидан матбуот анжумани ташкил этилди

Париж-2024 Олимпиаси учун қимматли рейтинг очколари ўйналадиган ушбу мусобақада Рио-2016, Токио-2020 Олимпиадаси совриндорлари ҳам иштирок этишини алоҳида таъкидлаб ўтмоқ зарур.

Ушбу нуфузли мусобақа олдидан матбуот анжумани ташкил этилди. Унда Ўзбекистон Республикаси Спорт вазири Адҳам Икромов, Самарқанд вилояти ҳокими ўринбосари Рустам Қобилов, Ўзбекистон триатлон федерацияси ва Халқаро триатлон федерацияси раҳбарияти вакиллари, шунингдек, спортчилар иштирок этди. Olamsport.com сайти мухбирлари ҳам Ўзбекистон туризм вазирлиги томонидан ташкил этилган пресс-тур доирасида ушбу матбуот анжуманида иштирок этди.

Тадбирда дастлаб, Адҳам Илҳомович сўз олди ва Ўзбекистон триатлон федерацияси ташкил топганига кўп бўлмаган бўлса-да, нуфузли мусобақаларни ташкил этиш борасида катта тажрибага эга бўлиб бораётганини таъкидлади.

Вазир ҳафта якунида бўлиб ўтадиган Жаҳон кубоги босқичи ҳам юқори савияда ўтказилишини айтиб ўтди.

Шунингдек, Адҳам Икромов ушбу мусобақада иштирок этувчи спортчилар географияси ҳам кенг эканини алоҳида таъкидлади. Турнирда фақатгина Жанубий Америка мамлакатлари, жумладан, Аргентина, Бразилия, Чили каби давлатлардан спортчилар етиб келишида муаммолар юзага келган.