Олимпиададаги хоккей турнирининг 1/2 финал жуфтликлари маълум бўлди

Оқ Олимпиаданинг энг томошабоп спорт тури ҳисобланган эркаклар ўртасидаги хоккей баҳсларида 1/2 финал иштирокчилари маълум бўлди. Кутилганидек, ғолиблик учун фаворитлар қаторида эътироф этилган Канада, АҚШ, Словакия ва Финляндия терма жамоалари 1/2 финалга етиб келди. 

АҚШ терма жамоаси Олимпия ўйинларининг чорак финалида Швецияни 2:1 ҳисобида мағлуб этди. Ғолиб жамоа таркибида Дилан Ларкин (32-дақиқа) ва Куинн Хьюз (64), шведлар сафида Мики Зибанежад (59) гол муаллифига айланлди. Энди америкалик хоккейчилар 20 февраль куни 1/2 финалда Германияни 4:1 ҳисобида мағлуб этган Словакия терма жамоаси билан ўйнайдилар. 

Яна бир ярим финалда шу куни Канада ва Финляндия терма жамоалари ўзаро тўқнаш келади. Иккала жамоа ҳам чорак финалда қўшимча бўлимларда иродали ғалабага эришди. Канада Чехияни (4:3), Финляндия Швейцарияни мағлуб (3:2) этди. 

Ярим финалда мағлубиятга учраган жамоалар 21 февраль куни учинчи ўрин учун учрашувда ҳисоб-китоб қилади. Финал 22 февраль куни бўлиб ўтади.