ОЛИМПИАДАГАЧА. Лондондаги Олимпиада Ўзбекистон учун қандай ўтган?

Делегациямиз вакиллари 15 та спорт туридан 53 нафар спортчи (36 нафар эркак, 17 нафар аёл) билан ўйинларда Ўзбекистон шарафини ҳимоя қилган.

Қайси спорт туридан неча нафар спортчи иштирок этган? 

Бокс - 6 нафар 

Эркин кураш - 8 нафар 

Юнон-рум кураши - 2 нафар 

Спорт гимнастикаси - 1 нафар 

Дзюдо - 6 нафар 

Енгил атлетика - 13 нафар

Сузиш - 2 нафар 

Ўқ отиш - 1 нафар 

Оғир атлетика - 6 нафар 

Трамполин - 1 нафар

Велоспорт - 2 нафар 

Таэквондо - 3 нафар

Теннис - 1 нафар 

Бадиий гимнастика - 1 нафар 

Совриндорлар 

Ўзбекистон ушбу Олимпия ўйинларида 2 та бронза медалини қўлга киритган. Дзюдо бўйича 60 кг вазнда Ришод Собиров ўзининг Олимпия ўйинларидаги иккинчи бронза медалини қўлга киритган бўлса, бокс бўйича 75 кг вазнда Аббос Атоев ҳам Ўзбекистонга яна бир бронза медалини олиб келган. Шунингдек, МОҚ 2012 йил 6 ноябрда эркин курашчимиз Сослан Тигиевнинг бронза ҳамда 2019 йилда Артур Таймазовнинг олтин медалларини допинг сабабли бекор қилган.

Ўзбекистон ушбу натижа билан медаллар жамғариш бўйича умумжамоа ҳисобида 76-ўринни банд этган. Рейтингнинг биринчи поғонасини АҚШ (48 та олтин, 26 та кумуш, 30 та бронза), иккинчи ўрнини Хитой (39 та олтин, 31 та кумуш, 22 та бронза) эгаллаган бўлса, кучли учликка эса Буюк Британия (29 та олтин, 18 та кумуш, 18 та бронза) якун ясаган.

Британияда бўлиб ўтган Олимпия ўйинларида 204 та мамлакатдан 10518 нафар спортчилар (5863 та эркак, 4655 та аёл) 26 та спорт тури бўйича мусобақаларда иштирок этган.

Ҳабиб Жўрабоев тайёрлади