Онс Жабер: "Таслим бўлмайман!"

"Жуда кўп танаффус олишга мажбур бўлдим. Бироқ бу ҳам камлик қилди. Монреалдаги турнирга тайёр эмасдим, чунки "Уимблдон"даги мағлубият менга жуда катта таъсир ўтказганди. Вақтимни оилам билан ўтказдим. Финални ёддан чиқаришга уриндим, бироқ барчаси оғир ўтди.

Энди ишга қайтиш ва олдинга ҳаракатланиш керак. Бунинг учун турнирларда ўйнаб, диққат-эътиборимни жамлаб олишим лозим. Таслим бўлмайман. Ўзимга ишонаман ва ишлашда давом этаман. Ҳар бир учрашувимда 100 фоиз кучим билан ўйнайман.

Рафаэль Надаль шундай деганди, ҳеч қачон "агар, агар, агар" бўлмайди. Шу сабабли агарда бундай қилганимда, деб ўйланиб ўтирмайман. Дунёнинг энг зўр теннисчиларидан бири бўлиш имконияти бор эди. Афсуски, энди бунга яна вақт керак. Балки бу ҳам яхшиликкадир. Кунлар ўтади ва ўзимнинг нималарга қодирлигимни намойиш этиб бораман. Балки менга ҳали эртадир. Аммо тўғри йўлда эканлигимга ишонаман", - деди Онс Жабер.