Осиё чемпионати. Боксчи-йигитларимиз Марказий Осиё дербиларида ғалаба қозонишди

Бугун Ўзбекистон терма жамоасининг 6 нафар боксчиси 1/2 финал чиптаси учун рингга кўтарилди. Бугунги жангларда ғалаба қозонган боксчилар Осиё чемпионатининг камида бронза медалини нақд қилишди.   

Биргина боксчиларимизнинг бугунги иштирокини бошлаб берган Сабина Бобоқулова (-48 кг) тенг курашлар остида кечган жангда қозоғистонлик Айгерим Саттибаевага 2:3 ҳисобида имкониятни бой бериб қўйди. Қолган барча чарм қўлқоп усталаримиз рақиблари устидан яққол устунлик билан зафар қучиб, 1/2 финалга йўл олишди.   

-80 кг вазн тоифасидаги жангда ҳам ўзбек-қозоқ боксчилари қарама-қаршилигига гувоҳ бўлдик. Фазлиддин Эркинбоев Эрассил Жакпековни 5:0 ҳисобида енгди. Жасурбек Йўлдошев ва Жавоҳир Абдураҳимов қирғизистонлик рақибларига ҳеч қандай имконият қолдиришмади. Боксчиларимизнинг бугунги иштирокини ёпиб берган жангда Ҳалимжон Мамасолиевнинг мўғулистонлик рақиби Энкисанаа Гантулга жароҳати сабаб рингга чиқмади ва техник ғалаба ҳамюртимизга тақдим этилди.   

Бугун рингга чиққан боксчиларимиз:

-48 кг: Сабина Бобоқулова - Айгерим Саттибаева (Қозоғистон) 2:3

-57 кг: Нигина Ўктамова - Чинг-Ю Яо (Хитой Тайпейи) 5:0

-85 кг: Жасурбек Йўлдошев - Муҳаммадазиз Закиров (Қирғиз Республикаси) 5:0

-75 кг: Жавоҳир Абдураҳимов - Атаи Дамир (Қирғиз Республикаси) 5:0

-80 кг: Фазлиддин Эркинбоев - Эрассил Жакпеков (Қозоғистон) 5:0

-90 кг: Ҳалимжон Мамасолиев - Энкисанаа Гантулга (Мўғулистон) техник ғалаба