Осиё чемпионати. Гулруҳбегим ва Афрузада муҳим ғалабалар

Мукофот жамғармаси 80 000 АҚШ долларини ташкил этувчи мазкур мусобақада Ўзбекистон терма жамоаси ҳам катта таркибда қатнашяпти. Қитъа чемпионатининг аёллар ўртасидаги баҳсларида 23 давлатдан 101 нафар иштирокчи медаллар учун дона сурмоқда. 

Терма жамоамиз етакчилари ниҳоят 7-турда муҳим ғалабани қўлга киритишди. Ёшлар ўртасида икки карра жаҳон чемпиони Афруза Ҳамдамова оқ доналарда Шри-Ланка вакиласи Девиндия Гунавардҳанани, бир муддат АҚШ шарафини ҳимоя қилган Гулруҳбегим Тоҳиржонова эса қозоғистонлик Элназ Калиахметни мағлубиятга учратди. Ҳар икки шахматчимиз 6-турда рақибаларига имкониятни бой бериб қўйишган эди. 

Тажрибали шахматчимиз Нодира Нодиржонова ҳиндистонлик Маниша Кирандан устун келди. Бу турда Зилола Актамова, Лилия Белая ва Одина Олимова ҳам ўз партияларида зафар қучишди. Гулдона Каримова, Нилуфархон Имомқўзиева, Асал Салимова, Барчиной Шокиржонова, Маржона Маликова, Рукия Олимова, Мадинабону Халилова рақибаларидан енгилишди. Умида Омонова ва Моҳим Ўрозмуҳаммедова дуранг қайд этишди. 

Еттинчи турдан сўнг қизларимиз орасида энг яхши натижани Гулруҳбегим Тоҳиржонова ва Афруза Ҳамдамова қайд этиб турибди. Гулруҳбегим 5 очко билан қўшимча кўрсаткичларга кўра 9-ўринни банд этган. Шунча очкога эга Ҳамдамова 11-поғонадан жой олган. Турнир жадвалида 6 очкодан тўплаган ҳиндистонлик Сешадри Срижа ва мўғулистонлик Бат-Эрдене Мунгунзул қўшпешқадамлик қилмоқда. Кейинги ўринлардаги Валентина Гунина, Анастасия Бондарук ва Агравал Вантика ҳисобида 5,5 очкодан бор.   

Бугун ўтказиладиган 8-турда Тоҳиржонова оқ доналарда россиялик Валентина Гунинага қарши баҳс олиб боради. Ҳамдамова эса қора доналарда ўзи сингари 5 очкога эга хиндистонлик Гейт Свати билан ҳисоб-китоб қилади.