Осиё чемпионатида биринчи марта кучли учликдамиз

Қитъанинг энг иқтидорли полвонлари иштирокида ўтган мазкур мусобақада Ўзбекистон спортчилари жами 4 та олтин, 2 та кумуш ва 6 та бронза медалига сазовор бўлдилар.

Жумладан, юнон-рим кураши бўйича бўлиб ўтган мусобақаларда Илхом Баҳромов (-50 кг) ва Жавоҳир Мирахмедов (-55 кг) олтин медални қўлга киритган бўлса, Мирзабек Рахматов (-66 кг) ҳамда Жалгасбай Бердимуратов (-84 кг) бронза медали соҳиби бўлдилар.

Аёллар кураши бўйича ўтказилган беллашувларда бир йўла уч нафар юртдошимиз Нодира Собирова (-51 кг), Набира Есенбаева (-59 кг) ва Бахтигул Болтаниёзова (-67 кг) бронза медалларини қўлга киритдилар.

Эркин кураш мусобақаларида совриндор бўлган спортчиларимиз сафи янада салмоқли бўлди. Хусусан, Ғуломжон Абдуллаев (-55 кг) ва Темуржон Усмоноҳунов (-60 кг) Осиё чемпионидек шарафли унвонга сазовор бўлишган бўлса, Мажид Муродов (-84 кг) ва Ҳасанбой Рахимов (-120 кг) кумуш, Шоҳрух Сапаев (-66 кг) эса бронза медалига сазовор бўлди.

Умумжамоа ҳисобида 56 очко жамғарган эркин курашчиларимиз биринчи маротаба кучли учликдан ўрин эгаллашди. Биринчи ўринни Ҳиндистон терма жамоаси (61 очко) эгаллаган бўлса, иккинчи ўринни ҳамюртларимиз билан бир хил очко жамғарган ва фақатгина қўшимча кўрсаткичларга кўра олдинга чиққан эронлик полвонлар банд этишди.

Ўз навбатида юнон-рим курашчиларимиз умумжамоа ҳисобида тўртинчи, қизлар терма жамоамиз эса бешинчи ўринни эгаллашди.