Осиё чемпионатида зафарли одим

Бухоро вилоятида спортнинг пенчак силат тури бўйича бўлиб ўтган халқаро турнир ҳамда Осиё чемпионатида наманганлик спортчи ёшлар муносиб иштирок этиб, салмоқли натижаларни қўлга киритиб келишлари бу спорт турига қизиқиш ва эътибордан дарак беради.

Янги Наманган тумани 70-сонли умумтаълим мактабининг жисмоний тарбия фани ўқитувчиси Абдулбори Тошбоев бошчилигидаги Наманган вилояти терма жамоаси аъзолари ушбу нуфузли мусобақаларда қатор медаллар шодасига эга бўлди.

Жумладан, Янги Наманган туманидаги 70-мактабнинг 5-синф ўқувчиси Ёсинхон Ҳусниддинов ўз вазнида халқаро турнирда олтин медаль, қитъамиз миқёсидаги рақобатда эса кумуш медали билан тақдирланди. Чемпион сифатида эътироф этилган Ёсинхон устози Абдубори Тошбоев билан жорий йилнинг 16-23 декабрь кунлари Бирлашган Араб Амирликларининг Абу Даби шаҳри мезбонлик қиладиган жаҳон чемпионатида иштирок этади.  

Наманган шаҳридаги 3-мактабнинг 5-синф ўқувчиси Азизбек Мухторов, 43-мактабнинг 5-синф ўқувчиси Олим Маҳмудов Осиё чемпионатининг кумуш медалларига муносиб кўрилди.

38-мактабнинг 4-синф ўқувчиси Умархон Раҳимов халқаро турнирда ғолибликнинг энг юқори шоҳсупасига кўтарилган бўлса, турнирда финалгача етиб келган 21-мактабнинг 4-синф ўқувчиси Муҳаммад Нишонбоев вице-чемпионликка сазовор бўлди.

Наманган вилояти жамоасининг спортчи-ёшлари республика Спорт вазирлигининг диплом, қимматбаҳо совринларига эга бўлишди.