21 авг 07:00
Янгиликлар

Осиё ўйинлари ғолибларига қанча пул мукофоти ваъда қилинмоқда?
Маълумки, Олимпиада, Осиё ўйинлари каби нуфузли мусобақалар олдидан ғолиб ва совриндорлар сафидан ўрин олган спортчиларга давлат томонидан пул мукофотлари эълон қилинади. Кўпчиликни 18-Осиё ўйинлари учун ҳам ваъда қилинган пул мукофоти қизиқтириши табиий.
Айнан шу савол билан спортчиларимизни Осиё ўйинларига расмий кузатиш маросимида мурожаат қилганимизда тез орада ҳукуматнинг бу борадаги тегишли ҳужжати эълон қилинади, деган жавобни олгандик. Лекин ҳозирча ҳеч бир расмий манбада бу ҳақдаги хабар эълон қилинмади.
Биздаги маълумотларга кўра, Осиё ўйинлари-2018 ғолибларига, яъни олтин медал соҳибларига 15 000 АҚШ доллари миқдоридаги пул мукофоти топширилади. Яна ойлик 5 миллион сўмлик стипендия ҳам жорий қилинади. Кумуш ва бронза медали эгаларига бериладиган мукофот пуллари бўйича ҳозирча маълумотга эга эмасмиз.
Эслатиб ўтамиз, Қозоғистон ҳукумати Осиё ўйинлари ғолибларига 10 000 АҚШ доллари миқдорида пул мукофоти берилишини эълон қилганди. Кумуш медал эгалари 5000, бронза медал соҳиблари эса 3000 долларга эга бўлишади.
Камолиддин Алимов (Палембанг, Индонезия)
Фикрлар